Michael Bolton cla pa duna Aruba un presentacion mas largo

ORANJESTAD (AAN): Hopi hende ta pendiente pe y diaranson merdia el a yega nos isla y ya por bisa cu el a keda encanta cu locual el a mira di Aruba. E ta cla pa haci un presentacion di dos ora largo diahuebs, debi cu tabatin un problema di comunicacion cu e agencia di Air Supply cu lo no ta presente pa e evento di diahuebs.
Michael Bolton a nace dia 26 di februari 1953 na New Haven, Connecticut. E ta un cantante y compositor Mericano cu a logra hopi exito den e mita di e epoca di 80 y comienso di e epoca 90. Su voz unico a sa di impacta mundo henter y tabata conoci pa ta un di e exponentenan mas popular di e genero di Soft-Rock y Balada Romantico Mericano di e epoca ey. Su logronan ta inclui benta di 53 miyon di album, ocho album den Top Ten, dos single posiciona como number uno riba e lista di Billboard y tambe el a ricibi varios premio manera di Grammy.
El a nace di un seno familiar Hudiu di origen Ruso di New Haven, Connecticut na Merca. E ta e yiu mas chikito di 3 ruman. El a sa di demostra su gran talento musical desde cu e ta chikito y cu apenas 16 aña ya el a firma su prome contracto discografico. Su prome incursion den e mundo di musica tabata ora el a forma parti di e grupo “The Nomads”. Su mayornan a huur un saxofon ora cu e tabatin solamente shete aña, pero realidad ta, cu e no a siña toc’e, sino e tabata imita e zonido cu su bos. El a cuminsa compone su propio canticanan cu su 12 aña, ora cu su mama a regal’e su prome guitara. Cu su 15 aña ya caba e tabata graba pa prome biaha den studio.
Awendia Bolton ta tata di tres yiu muher (Isa, Holly y Taryn) hunto cu su prome casa Maureen McGuire, unda cu nan a forma un hogar desde 1975 te 1990. Na edad di 57 aña, Bolton a estrena como welo, na momento cu su yiu Taryn di 31 aña, a duna luz na un mucha muher.
Durante e ultimo añanan, nan a otorg’e varios honor, no solamente pa su gran exito den e mundo di musica, sino tambe pa e labor caritativo cu el a desaroya pa diferente centro beneficioso, recaudando fondo. Bolton ta fundado tambe di e ekipo di softball The Bolton Bombers. Mirando e gran necesidad cu tin den comunidad, el a inicia “The Michael Bolton Charities Inc.” (pa mucha y hende muher cu riesgo) cu ta un organizacion cu el a crea na 1993 y ta dedica na e muchanan y e hende muhernan cu ta sufri abuso emocional...

FUENTE: http://www.diario.aw