(Aruba) Carchinan pa Aruba Music Explosion ta keda na florin

Pa por cumpli cu e peticion di un cantidad di nos hendenan local, e organisadonan di Aruba Music Explosion a dicidi di mantene e prijs di carchinan na florin en bes di dollar pa tres dia mas. Na un prome instante a menciona cu pa diadomingo e campaña lo termina, pero a dicidi cu lo sigui te cu diaranson dia 31 di augustus.
Cu patrosinio di Gobierno di Aruba, Aruba Tourism Authority, Aeropuerto Internacional Reina Beatrix y De Palm Tours, e compania renombra internacionalmente S&E Enterprises ta cla pa presenta "Aruba Music Explosion" riba dianan 22, 23 y 24 di september proximo na Piedra Plat Entertainment Center. Riba diahuebs 22 di september lo presenta Michael Bolton y Air Supply. Diabierna 23 di september lo tin presentacion di e cantantenan Gilberto Santa Rosa y Olga Tañon y riba diasabra 24 di september lo presenta Luis Fonsi, Servando y Florentino y Felipe Pelaez. Di berdad cu un lista di cantante di tanto renombre internacional asina, cantando den un solo evento, nos nunca a yega di conoce den pasado aki na Aruba. Pa mas informacion di e artistanan y di e conciertonan general, por subi e website www.arubamusicexplosion.com.

FUENTE: http://www.24ora.com/local-mainmenu-5/36054-carchinan-pa-aruba-music-explosion-ta-keda-na-florin.html